婆婆說：「我早上醒來的時候經常覺得手痺，問過醫生，醫生話我睡眠姿勢唔正確，無法啦！不過最近同班耆英去旅行，個同房話佢成晚起身去小便，去咗幾次，次次見我都係側住個身，個姿勢都一樣，唔通好瞓成咁，幾個鐘頭，無理由郁都唔郁下。諗諗吓有啲驚驚地，唔通佢死咗，就伸隻手去試吓睇吓我有無呼吸。好彩，仲有呼吸，仲未死，不過就俾你嚇到瞓唔到啦。佢又問我知唔知佢成晚起身去小便。我知我食咗安眠藥瞓覺就乜都唔知嘅，但係就唔知會郁都唔郁，唔會轉身嘅。唔怪得啦，成晚側住個身壓住隻手郁都唔郁，想唔痺都唔得啦，醫生仲話我睡眠姿勢唔正確，原來咁解！我唔想再食安眠藥啦，咁恐怖！」。
我說：「睡眠姿勢正唔正確呢個問題，我就覺得好攪笑，好似你咁，就係被迫固定姿勢，唔知算正確唔正確啦！專家話正常瞓覺會發夢，咁應該都會郁囉！我就覺得最簡單莫過於夏天瞓熱咗個位，應該識自動轉身至算正常。瞓著覺就無理由有意識控制姿勢。」。
婆婆問：「我有啲朋友話中藥都醫失眠，唔知真唔真？」。
我笑說：「中國是世界四大文明古國之一，應該有很多過人之處的。歷史記載神農氏嘗百草已經是數千年前的事。西醫進入香港人的心只有百年，各有長短，你信甚麼悉隨尊便。」。
婆婆問：「係唔係好似西醫咁，人人都係食果幾種呢？」。
我說：「失眠的原因很多，最簡單，又可能無人未試過的，就係太凍，凍到瞓唔著；熱到瞓唔著；又如飢寒交逼，聽過吧，都會瞓唔著；再如嘈到瞓唔著；又如你個朋友被你嚇到瞓唔著；又有激到瞓唔著，興奮到瞓唔著，吃得太飽等等都是大家都可能試過的。其它的如環境太潮濕、有痛症等等。要找出原因，不同的病因用不同的方法治療。」。
婆婆說：「我以前服鎮靜劑，而家食安眠藥，邊樣重啲呀。」。
我說：「鎮靜劑是神經系統抑制劑，應該係安眠藥劑量重。」。
婆婆說：「怪不得啦，我仲以為自己好好瞓添！原來係不醒人事，怪不知平時人哋話外面嘈到拆天我都唔知啦，藥力未過，真係不醒人事嘅！醒咗都仲感覺矇矇地，要活動一陣先至會好啲。」。
有一次，婆婆說：「幾好喎！我瞓覺前乜瞓覺藥都無食啦，我知自己有轉身，瞓醒覺個人覺得好醒神，隻手無痺！」。
#失眠 #失眠原因 #睡眠 #睡眠姿勢
#安眠藥 #鎮靜劑 #神經系統抑制劑
#昏迷 #手痺
沒有留言:
張貼留言