其實傾心事，唔想人哋駁嘴可以同屋企啲毛孩（貓貓狗狗）傾訴，佢哋會好了解你嘅心事。又會有少少回應，只係你可能唔明白佢講嘅嘢係乜。
有時唔想人駁嘴又想傾訴吓最好搵啲唔會駁嘴嘅做傾訴對象。我有次同一個長者講你可以坐喺公園同啲花花草草或者啲植物甚至枱凳講，唔使大聲，自言自語就得，或者攬住個枕頭同枕頭傾都一樣可以舒緩心中嘅唔舒服。長者即時話，佢有兩個屋企，其中一間屋比較少返去住。有次，返咗去同祖先講完一輪心情好返好多。
有個年輕人話，我聽你勸，有時唔開心，屋企無人嘅時候我企喺窗口對着窗外嘅花花草草講完一輪成個人舒服晒。我話即使有人喺屋企都冇問題啦，你對住啲窗門自言自語人哋未必留意到，不過就最緊要你自己覺得安心囉。
又有人話匿埋喺廁所自言自語囉，都可以好舒服。
有啲人就話唔開心就會攬住個毛公仔出氣，真係好解氣。
點解我話可以同花花草草傾訴呢？因為花花草草係識聽我哋講嘅嘢嘅，只不過係我哋唔知佢哋明白啫。
曾幾何時我種咗好多非洲紫羅蘭，有一日有個朋友話想攞一盤，我話冇問題呀你咪攞囉，有幾十盤咁多，佢就揀咗一盤話要，跟住佢話今晚去街唔攞住過幾日先攞。過咗幾日佢嚟攞花，佢唔開心，佢話有冇搞錯呀！你係咪唔捨得俾，所以無好好地對嗰盤紫羅蘭呀，謝咗啲喎。我話你可以揀過第二盤。佢終於揀咗第二盤。過咗一段時間，佢話盤紫羅蘭死咗，原來係自己唔適合種紫羅蘭，唔係我冇善待佢，怪錯咗我添！頁首嗰盤紫羅蘭正正係同當年佢要嗰盤嘅品種同埋顏色一模一樣，如果佢有緣見到，唔知仲唔記得呢件事呢？
另外一種更神奇，我診所種咗一啲蘆薈，生得唔係好整齊，有啲東歪西倒嘅感覺，有時又有客人話剪返屋企放喺雪櫃有傷口嘅時候有得用。所以就更加醜怪，我有一次淋水嘅時候話，我呢度地方唔多，睇落有啲亂七八糟。幾日後我開始覺得棵蘆薈有啲奇怪，又講唔出有咩問題，連續過咗幾日假期之後，我終於明白，棵蘆薈竟然變成對生葉片，即係好似一個平面咁樣生，最奇怪嘅係已經生咗嗰啲都變成對生，唔係新生嘅。簡直難以置信，但係又真係事實。
你話啲花花草草係唔係 解語花 呢？係唔係識得聽你講嘅嘢呢？
睇吓娛樂圈裕美，佢減肥，抑鬱症發作嘅時候只可以同屋企啲枱枱凳凳、死物傾訴。
裕美專訪｜迷失期變購物狂感被跟蹤 壓力爆煲：講錯一句即被照肺
原文網址: 裕美專訪｜迷失期變購物狂感被跟蹤 壓力爆煲：講錯一句即被照肺 | 香港01 https://www.hk01.com/article/60306377?utm_source=01articlecopy&utm_medium=referral
如果你有心事，需要搵人傾訴，不妨參考吓呢啲方法。
#解語花
沒有留言:
張貼留言